س: عرفينا بنفسك؟
ج: أنا خلود عادل محمد، عندي 30 سنة، خريجة معهد إدارة أعمال ومحاسبة. الرياضة جزء أساسي جدًا من حياتي، وبدأت ممارستها من سن 10 سنوات.

س: إيه أهم الرياضات اللي مارستيها؟
ج: كنت لاعبة في منتخب مصر للوشو كونغ فو، وكمان مارست الكيك بوكسينج والملاكمة والمواي تاي، وده ساعدني أكتسب خبرة كبيرة في مجالات مختلفة من الرياضات القتالية واللياقة البدنية.

س: إمتى بدأ اهتمامك بالجيم والفيتنس؟
ج: بدأت الجيم وأنا عندي 17 سنة، ومن وقتها كان عندي شغف كبير بالتمرين وحب إني أفهم جسمي بشكل أكبر، مش مجرد إني أتمرن وخلاص.

س: إزاي طورتِ نفسك في مجال التدريب؟
ج: بدأت أهتم بدراسة التشريح وأخد الكورسات المتخصصة، وكنت حريصة إني أتعلم وأفهم حركة الجسم والعضلات بشكل علمي، علشان أقدر أشتغل في المجال بشكل احترافي وأساعد الناس بطريقة صحيحة.

س: إيه أكتر حاجة بتحبيها في شغلك؟
ج: أكتر حاجة بحبها هي إني أشوف تطور الشخص اللي بتمرنه، سواء في قوته أو أدائه أو ثقته بنفسه. إحساس إنك بتساعد شخص يغير جسمه وحياته للأفضل شيء ممتع جدًا بالنسبة لي.

س: إيه أهمية تقوية عضلات الـ Core؟
ج: عضلات الـ Core مش معناها عضلات البطن بس، لكنها بتشمل البطن والجوانب وأسفل الظهر، وتقويتها بتساعد على تحسين ثبات الجسم وتوازنه أثناء التمرين والحركة اليومية.

س: هل تقوية الـ Core بتأثر على أداء تمارين الجيم؟
ج: طبعًا. الـ Core القوي بيساعد على تحسين الأداء في تمارين زي السكوات والـRDL واللانجز، لأنه بيساعد الجسم يحافظ على الثبات والتحكم أثناء الحركة.

س: هل تمارين الـCore مهمة حتى لو الشخص مش بيلعب رياضة بشكل احترافي؟
ج: بالتأكيد، لأنها مش مرتبطة بالرياضيين فقط. كل شخص محتاج عضلات جذع قوية علشان تساعده في الحركة اليومية وتحسين وضعية الجسم وتقليل ضعف عضلات الجذع.

س: من وجهة نظرك، ليه الناس لازم تمارس الرياضة؟
ج: أنا دائمًا بنصح الناس كلها بممارسة الرياضة، لأن الرياضة مش مجرد شكل أو هدف مؤقت، لكنها أسلوب حياة. لما الرياضة تتحول لعادة، بتفرق في صحة الجسم، النشاط، القوة، والحالة النفسية.

س: إيه رسالتك للناس اللي لسه هتبدأ تتمرن؟
ج: ابدأوا حتى لو بخطوات بسيطة، والأهم إنكم تستمروا. متقارنوش نفسكم بحد تاني، وكل واحد يركز على تطوره هو. الرياضة رحلة، وكل خطوة فيها بتفرق.

س: وإيه خطتك للفترة الجاية؟
ج: الحمد لله أنا ناجحة جدًا في شغلي، ولسه عندي طموح كبير إني أكمل وأطور نفسي أكتر، سواء من خلال الدراسة والتعلم أو الخبرة العملية، وأفضل أقدم للناس كل ما يساعدهم يوصلوا لأفضل نسخة من نفسهم.

https://www.instagram.com/coach.kholoud_adel?stkn=OGpwandpa200YXNq