×

شاهد حوار مجال الفيتنس والتدريب الرياضي مع كوتش سارة شاكر

https://pagead2.googlesyndication.com/pagead/js/adsbygoogle.js?client=ca-pub-0552476612244730

السوال الأول
عرف نفسك الأول

أنا سارة شاكر
Mental & Body Fitness Coach.
ومؤسسة SA FORMA حاصلة على بكالوريوس علوم قسم بيولوجي..وبشتغل في مجال التدريب واللياقة البدنية.

لكن بالنسبة ليا الفيتنس أكبر بكتير من مجرد تمارين أو الوصول لشكل جسم معين. أنا مهتمة بالعلاقة بين العقل والجسم…وإزاي أفكارنا وعاداتنا وسلوكياتنا بتأثر على صحتنا والنتائج اللي بنقدر نحققها.

من هنا بدأت فكرة SA FORMA.. واللي فكرتها الأساسية إننا نشتغل على اللي جوا قبل اللي برا
لأن التغيير الحقيقي مش بيبدأ من الجسم بس..لكنه بيبدأ من طريقة تفكيرنا وتعاملنا مع نفسنا.

السوال التاني

بدأتي الرياضة إزاي وحبيتي مجال الفتنيس إزاي؟

دخولي مجال الفيتنس كان نتيجة اهتمامي بجسم الإنسان والصحة بشكل عام وده كان مرتبط كمان بدراستي للبيولوجي. فقررت انى زى ما درست جسم الانسان من الداخل ادرس كمان تشريح العضلات

ومع الوقت..اهتمامي اتحول لشغف حقيقي…خصوصًا لما بدأت أتعامل مع أشخاص مختلفين وأشوف تأثير الرياضة مش بس على شكل الجسم..لكن كمان على الحالة النفسية والثقة بالنفس وجودة الحياة.

أكتر حاجة شدتني للمجال هي إني اكتشفت إن كل شخص عنده رحلة مختلفة.. وإن النجاح مش مجرد برنامج تمرين أو نظام غذائي مناسب…لكن كمان فهم الشخص نفسه…وطريقة تفكيره…والعادات اللي محتاج يغيرها.

وده خلاني أحب المجال بشكل أعمق… وأشوف إن دوري مش بس إني أساعد حد يغير جسمه…لكن أساعده يبني نسخة صحية وأقوى من نفسه.

السوال الثالث

3- إيه أبسط أنواع الرياضة اللي ممكن نمارسها يوميًا ونقدر نستمر عليها؟

في رأيي.. المشي من أبسط وأفضل الأنشطة اللي ممكن نبدأ بيها.. لأنه مش محتاج إمكانيات خاصة أو مكان معين…وممكن نمارسه في أي وقت تقريبًا.

كمان فيه اختيارات بسيطة زي صعود السلم…وركوب العجل.. والتمارين المنزلية وتمارين الحركة والمرونة.

لكن أهم من نوع الرياضة هو اختيار نشاط يناسب طبيعة حياتنا ومستوانا البدني.. ونبدأ بشكل تدريجي.

مش لازم نبدأ بساعة تمرين يوميًا أو نحط لأنفسنا أهداف صعبة من أول يوم. ممكن نبدأ بـ10 أو 15 دقيقة ونزود بالتدريج.

أنا دايمًا بقول إن الاستمرارية أهم من المثالية.. لأن التغيير مش بيحصل من مجهود كبير بنعمله مرة واحدة..لكنه نتيجة خطوات صغيرة بنكررها كل يوم.

السوال الرابع

هل المكملات الغذائية مضرة؟

مش ممكن نحكم على المكملات الغذائية إنها مضرة أو مفيدة بشكل مطلق… لأن الموضوع بيعتمد على نوع المكمل، وجودة المنتج.. واحتياج الشخص… والجرعة المستخدمة.

المكملات الغذائية ممكن تكون مفيدة في حالات معينة…خصوصًا لما يكون فيه نقص غذائي أو احتياج مش قادرين نغطيه من الأكل وحده.

لكن لازم نفهم إنها اسمها مكملات لأنها بتكمل النظام الغذائي…مش بتحل محله.

المشكلة إن ناس كتير بتستخدمها بناءً على ترشيحات غير متخصصة أو إعلانات على السوشيال ميديا… من غير ما تعرف إذا كانت مناسبة ليها أصلًا.

نصيحتي إننا نهتم الأول بالتغذية المتوازنة.. ونستخدم أي مكمل بناءً على احتياج حقيقي وبعد الرجوع لمختص.. مع التأكد من مصدر المنتج وجودته.

السوال الخامس

  1. هل استخدام البروتين بعد التمرين ضروري؟

البروتين من العناصر الغذائية الأساسية.. وليه دور مهم في بناء العضلات وإصلاح الأنسجة والتعافي بعد التمرين.

لكن فيه مفهوم منتشر إن لازم نستخدم بودر البروتين فورًا بعد التمرين.. وده مش شرط.

الأهم هو إننا نوفر احتياج الجسم اليومي من البروتين.. ونوزعه بشكل مناسب على مدار اليوم.. حسب وزن الشخص ومستوى نشاطه وهدفه.

ومش شرط يكون البروتين في صورة مكمل…لأن عندنا مصادر غذائية كتير زي البيض..والدجاج.. والأسماك.. واللحوم.. والزبادي.. والجبن.. والبقوليات.

بودر البروتين مجرد اختيار عملي لبعض الأشخاص اللي بيكون صعب عليهم يغطوا احتياجاتهم من خلال الاكل.

يعني مش كل شخص بيروح الجيم محتاج مكمل بروتين… لكن كل شخص بيمارس نشاط بدني محتاج يهتم بتغذيته بشكل مناسب.

السوال السادس

  1. تنصحي الناس تدخل الجيم وتمارس الفيتنس؟

طبعًا..وبشجع كل شخص إنه يخصص جزء من وقته لنشاط بدني يناسبه..سواء في الجيم أو في البيت أو حتى بالمشي.

الرياضة مش رفاهية ولا مرتبطة بسن معين أو شكل جسم معين.. لكنها استثمار في صحتنا وجودة حياتنا على المدى الطويل.

ومش لازم نستنى لحد ما وزننا يزيد أو صحتنا تتأثر عشان نبدأ نهتم بنفسنا.

كمان مهم نفهم إن دخول الجيم مش معناه إن هدفنا الوحيد يكون خسارة الوزن أو بناء العضلات… لكن تحسين القوة واللياقة والنوم والمزاج والثقة بالنفس.

وأهم نصيحة أقدر أقدمها لأي شخص هي: ابدأ من مكانك.. وبإمكانياتك.. وبالسرعة اللي تناسبك..ومتقارنش رحلتك برحلة حد تاني.

لأن الفيتنس مش تحدي مؤقت بنبدأه ونخلصه..لكنه أسلوب حياة.

وأخيرًا..أنا مؤمنة إننا مش محتاجين نغير شكل جسمنا بس
لكن محتاجين نغير علاقتنا بنفسنا وبصحتنا.. وده بالضبط جوهر الرسالة اللي بحاول أقدمها من خلال SA FORMA.

Mind Before Body.

https://www.instagram.com/coachsarashaker

إرسال التعليق

You May Have Missed