شاهد حوار مجال الفيتنس والتدريب الرياضي مع كوتش نور حداد
السؤال الأول: عرفينا بنفسك.
أنا كابتن نور حداد بشتغل في مجال الفيتنس والتدريب الرياضي بقالي حوالي 11 سنة بدات دراستي وخطواتي الأولى في المجال بره مصر وبعدها رجعت وكملت هنا في مصر وده اداني فرصة أشوف مدارس وأساليب مختلفة في التدريب واشتغلت مع ناس كتير جدًا وكل شخص كان ليه هدف وتحدي مختلف وده خلاني أكتسب خبرة أكبر وأفهم إن دور المدرب مش بس إنه يحط برنامج تمرين لكن كمان يساعد الشخص يحسن صحته ولياقته ويوصل لهدفه بطريقة علمية وصحية.
السؤال الثاني: بدأتي الرياضة إزاي وحبيتي الفيتنس إمتى؟
أنا دخلت المجال الرياضي عشان قرأت في مرة جملة فضلت مؤمنة بيها لحد النهارده وهي إن الاستثمار الحقيقي اللي عمرك ما هتخسري فيه ولا هيخذلك هو استثمارك في نفسك وصحتك. لأن جسمك وشكلك ولياقتك من أكتر الحاجات اللي بتسندك وبتعرف الناس بيك قبل ما تبدأ حتى بالكلام. وده كان السبب اللي خلاني أحب المجال وأقرر أتخصص فيه.
السؤال الثالث: إيه فوائد تمارين البار؟
لو تقصد بتمارين البار تمارين المقاومة بشكل عام سواء بالأوزان الحرة أو الأجهزة أو البار الحديد فهي من أهم أنواع التمارين اللي أنصح بيها لأنها مش بس بتحسن شكل الجسم لكنها كمان بتقوي العضلات والعظام وبتزود القوة والتحمل وبتحسن كفاءة الجسم في الحركة وبتساعد على الحفاظ على الكتلة العضلية مع التقدم في السن كمان ليها دور مهم في تحسين تكوين الجسم وتنظيم مستوى السكر في الدم والأهم إن التمرين يكون مناسب لقدرات كل شخص ويتعمل بطريقة صحيحة وبأحمال متدرجة.
السؤال الرابع: هل المكملات الغذائية مضرة؟
مش كل المكملات الغذائية مضرة ومش كلها مناسبة لكل الناس الموضوع بيتوقف على نوع المكمل والجرعة وجودة المنتج والحالة الصحية للشخص ومكملات ممكن تكون مفيدة لو الشخص عنده نقص أو مش قادر يغطي احتياجاته من الأكل لكن المكملات مش بديل للأكل الصحي ومش معنى إننا بنتمرن إننا لازم نستخدمهم ويفضل يكون استخدامها حسب احتياج الجسم وبعد استشارة متخصص
السؤال الخامس: استخدام البروتين بعد التمرين ولا؟
البروتين مهم جدا لبناء العضلات وتعافيها بعد التمرين لكن مش شرط ناخده بعد التمرين أو يكون في صورة مكمل المهم إن الشخص ياخد احتياجه اليومي من البروتين سواء من الأكل زي اللحوم والبيض والفراخ والأسماك أو من مكمل البروتين لو مش قادر يكمل احتياجه من الاكل و المكمل وسيلة مساعدة مش ضرورة لكل الناس.
السؤال السادس: تنصحي الناس تدخل جيم وفيتنس؟
اكيد أنصح الناس بممارسة الرياضة وخصوصًا إن الوعي بأهميتها زاد بشكل كبير وأعتقد إن مفيش بيت دلوقتي تقريبا إلا وفيه شخص أو اتنين بيمارسوا الرياضة الناس بدأت تفهم إن الرياضة مش رفاهية لكنها جزء أساسي من الحفاظ على الصحة وإنها بتساعد بشكل كبير في الوقاية وتقليل خطر الإصابة بأمراض منتشرة الوقتي زي مرض السكري وأمراض القلب ومقاومه الانسولين وغيرهم غير انها بتقضي ع اكبر مشكله ممكن اي حد يواجهها وهيا الفراغ او تكون عندك وقت كبير ومفيش عندك حاجه تعملها ف الرياضه اكيد عاملي الوقت ده ب اكتر حاجه نافعه وليها اهميه وهيا انك تحافظ ع نفسك وصحتك
https://www.facebook.com/groups/1812428646234228/?ref=share_group_link&mibextid=wwXIfr&rdid=dgcGHwrlEWZqemKK&share_url=https%3A%2F%2Fwww.facebook.com%2Fshare%2Fg%2F1BEZyYxpEd%2F%3Fmibextid%3DwwXIfr%26utm_source%3Dig%26utm_medium%3Dsocial%26utm_content%3Dlink_in_bio#
https://www.facebook.com/groups/1812428646234228/?ref=share_group_link&mibextid=wwXIfr&rdid=dgcGHwrlEWZqemKK&share_url=https%3A%2F%2Fwww.facebook.com%2Fshare%2Fg%2F1BEZyYxpEd%2F%3Fmibextid%3DwwXIfr%26utm_source%3Dig%26utm_medium%3Dsocial%26utm_content%3Dlink_in_bio#
إرسال التعليق