شاهد حوار مع كوتش نورهان عوض عبر موقع الاهلي ناو
السؤال الأول: عرفينا بنفسك؟
أنا كوتش نورهان عوض عندي 33 سنة Personal Trainer معتمدة ومتخصصة في التدريب ومساعدة الناس على تغيير شكل أجسامهم وتحسين صحتهم ولياقتهم البدنية. بالنسبة لي الرياضة مش مجرد شغل أو مهنة دي رحلة بدأت معايا كتجربة شخصية وبعد كده اتحولت لشغف ورسالة حابة أوصلها لأكبر عدد من الناس.
السؤال الثاني: ابتديتي الرياضة إزاي وحبيتي مجال الفيتنس إزاي؟
رحلتي مع الرياضة بدأت وأنا عندي 28 سنة بعد ما واجهت بعض المشاكل الصحية منها مقاومة الإنسولين والتهاب الأعصاب بالإضافة للتغيرات اللي حصلت في جسمي بعد الولادة. في الوقت ده قررت أنزل الجيم وأبدأ أهتم بصحتي لكن الموضوع بالنسبة لي ما وقفش عند مجرد التمرين بدأت أدرس وأقرأ وأخد كورسات في مجال الفيتنس و التدريب وكان هدفي الأول إني أفهم جسمي وأقدر أساعد نفسي. مع الوقت قدرت أغير شكل جسمي وأحسن لياقتي وبدأت أساعد الناس القريبين مني إنهم يحققوا نفس التغيير. اكتشفت إن عندي شغف كبير بالمجال وبالذات لما بشوف نتيجة تعب حد وتغيير ثقته بنفسه.
ومن هنا قررت أحول الشغف ده لمهنة وبدأت أدرس بشكل احترافي وأحصل على شهادات وكورسات معتمدة لحد ما بقيت Personal Trainer. وأكتر حاجة مؤمنة بيها إن الرياضة مش مرتبطة بسن معين ومفيش وقت متأخر إن الإنسان يبدأ يهتم بنفسه.
السؤال الثالث: عايزين نعرف إيه فوائد تمارين الـ Bar؟
تمارين الـ Bar بتجمع بين القوة العضلية والتحمل والتوازن والمرونة. من أهم فوائدها إنها بتحسن الـ Muscle Endurance وبتساعد على تقوية عضلات الجسم وبتحسن التوازن والتحكم في حركة الجسم .
السؤال الرابع: هل المكملات الغذائية مضرة؟
المكملات الغذائية مش مضرة في حد ذاتها لكن المشكلة بتكون في الاستخدام الخاطئ أو تناول مكملات من غير احتياج حقيقي ليها. لازم نفهم إن المكملات اسمها مكملات لأنها بتكمل نظام غذائي متوازن مش بتحل محل الأكل الصحي. في مكملات زي البروتين والكرياتين مثلاً ليها فوائد مثبتة علمياً عند استخدامها بشكل صحيح وبالجرعات المناسبة. أنا دايماً بفضل إن الأساس يكون الأكل والتدريب والنوم والاستمرارية وبعد كده نفكر في المكملات لو فيه احتياج فعلي ليها
السؤال الخامس: هل استخدام البروتين بعد التمرين ضروري؟
مش ضروري إن الشخص يشرب بروتين مباشرة بعد التمرين ودي من المفاهيم اللي محتاجة تتصحح. الأهم هو إجمالي كمية البروتين اللي الجسم بيحصل عليها خلال اليوم وتوزيعها بشكل مناسب على الوجبات. البروتين ممكن نحصل عليه من مصادر طبيعية زي الفراخ واللحوم والبيض والأسماك ومنتجات الألبان وممكن نستخدم الـ Whey Protein لو مش قادرين نكمل احتياجنا اليومي من الأكل. وبالنسبة لتوقيت تناوله ممكن يكون بعد التمرين كاختيار عملي وسهل لكن مش شرط يكون خلال دقائق من انتهاء التمرين الأهم إننا نوفر للجسم احتياجه من البروتين لدعم الاستشفاء العضلي والحفاظ على الكتلة العضلية وبنائها
السؤال السادس: هل بتنصحي الناس بدخول الجيم وممارسة الفيتنس؟
طبعاً وبشجع أي شخص إنه يبدأ يمارس الرياضة مش بس علشان شكل الجسم لكن علشان الصحة وجودة الحياة. وعايزة أقول لكل شخص مأجل بداية رحلته إنه مش محتاج يستنى الوقت المثالي ولا يستنى يوصل لوزن معين علشان يبدأ ابدأ بالمتاح وخد أول خطوة وخلي الرياضة أسلوب حياة مش مجرد مرحلة مؤقتة علشان تخس أو تغير شكل جسمك
إرسال التعليق