السؤال الأول: عرّفي نفسك “أنا كوتش ابتسام إبراهيم مدربة لياقة بدنية، بحب الرياضة جدًا وبحب أساعد الناس توصل لأهدافها، سواء خسارة وزن أو بناء عضلات أو تحسين صحتهم ولياقتهم. وبالنسبة لي، الرياضة مش مجرد شكل جسم، دي أسلوب حياة.”

لسؤال الثاني: بدأتي رياضة إزاي وحبيتي الفتنيس إزاي؟ “نا متخرجه من تربيه رباضيه كانت من حبي للحركة والتمرين، ومع الوقت بدأت أفهم أكتر عن جسم الإنسان والتمارين والتغذية، واكتشفت إن الفتنس مش مجرد تمرين بنعمله، لكنه بيغير نفسيتنا وثقتنا في نفسنا وطريقة حياتنا. ومن هنا حبيت المجال أكتر وقررت إني أطور نفسي فيه وأساعد غيري كمان.”

السؤال الثالث: إيه فوائد تمارين الـ Bar؟ “تمارين الـ Bar هي تمارين بتجمع بين عناصر من الباليه والبيلاتس وتمارين القوة، وبتعتمد بشكل كبير على التحكم في الحركة. من فوائدها إنها بتساعد على تحسين التوازن والمرونة، وتقوية العضلات، خصوصًا عضلات الرجلين والمؤخرة والـ Core، وكمان بتحسن التحكم في الجسم ووضعية الوقوف. والأهم إننا نختار التمارين المناسبة لمستوانا وقدراتنا.”

السؤال الرابع: هل المكملات الغذائية مضرة؟ “مش كل المكملات الغذائية مضرة، وفي نفس الوقت مش كل المكملات ضرورية. الموضوع بيعتمد على نوع المكمل والجرعة وحالتك الصحية واحتياجات جسمك. فيه مكملات ممكن تكون مفيدة في حالات معينة، لكن استخدامها بشكل عشوائي أو بجرعات زيادة ممكن يسبب أضرار. عشان كده لازم نعرف إحنا محتاجين إيه فعلًا، ونستشير متخصص قبل الاستخدام.”

السؤال الخامس: هل لازم أستخدم بروتين بعد التمرين؟ “لأ، مش لازم كل الناس تستخدم بروتين بودر بعد التمرين. البروتين مهم جدًا لبناء العضلات والتعافي، لكن نقدر ناخده من الأكل الطبيعي زي البيض والفراخ والسمك والزبادي. لو احتياجك من البروتين مش بتقدري توفريه من الأكل، ساعتها ممكن البروتين البودر يساعدك. والأهم هو إجمالي البروتين اللي بتاخديه على مدار اليوم، مش إنك تشربيه فورًا بعد التمرين.”

السؤال السادس: تنصحي الناس تدخل الجيم وتمارس الفتنيس ليه؟ “أنصح أي حد يبدأ يمارس الرياضة، مش بس عشان يخس أو يبني عضلات، لكن عشان صحته وجودة حياته. الرياضة بتساعدنا نحافظ على قوة عضلاتنا وعظامنا، وتحسن لياقتنا ومزاجنا، وتخلينا نقدر نتحرك ونعتمد على نفسنا مع التقدم في العمر. ومش شرط تبدأي بأوزان كبيرة أو تمرين صعب، ابدأي على قد مستواكي، واستمرّي، ومع الوقت هتشوفي الفرق.”

https://www.instagram.com/coach_ebtsam_ibrahim

https://www.facebook.com/CoachEbtsam?mibextid=wwXIfr&rdid=AZ1qHjafGgsCWYWg&share_url=https%3A%2F%2Fwww.facebook.com%2Fshare%2F1PEbjv7sYi%2F%3Fmibextid%3DwwXIfr%26utm_source%3Dig%26utm_medium%3Dsocial%26utm_content%3Dlink_in_bio#