السؤال الأول: عرّفي نفسك الأول. أنا كوتش ندى سعيد، طالبة بكلية التربية الرياضية، ومهتمة بمجال التدريب الرياضي والتغذية وبناء العضلات. مؤسسة Next By Nada، وهو مشروع بدأت من خلاله أساعد الناس على تحقيق أهدافهم الرياضية، سواء زيادة الكتلة العضلية أو خسارة الدهون أو تحسين اللياقة البدنية وشكل الجسم. بحرص دايمًا على تطوير نفسي علميًا وعمليًا، لأن شايفة إن المدرب الناجح مش بس اللي يقدر يمرّن الناس، لكن اللي يكون عنده علم يقدر من خلاله يوجّه كل شخص للطريق المناسب ليه، بشكل آمن ومدروس.

السؤال الثاني: بدأتي الرياضة إزاي، وحبيتي مجال الفتنيس إزاي؟ بدايتي كانت من حبي للرياضة واهتمامي بالتمرين وتطوير شكل الجسم والأداء البدني. ومع الوقت، الموضوع بالنسبالي اتحول من مجرد ممارسة للرياضة إلى شغف حقيقي إني أفهم جسم الإنسان بيستجيب للتمرين إزاي، وإزاي التغذية والالتزام بيأثروا على النتائج. وده شجعني إني أدرس التربية الرياضية، وأطور نفسي من خلال الكورسات والتطبيق العملي. ومع الوقت اكتشفت إن أكتر حاجة بحبها هي إني أساعد غيري يحقق هدفه ويشوف نتيجة تعبه، وده كان من أهم الأسباب اللي خلتني أبدأ Next By Na

السؤال الثالث: إيه فوائد تمارين الـ Bar؟ لو بنتكلم عن تمارين البار الحديدي، فهي من الأدوات المهمة جدًا في تدريب المقاومة وبناء العضلات. بتساعد على زيادة القوة والكتلة العضلية، وتحسين القدرة على أداء الحركات المختلفة، وكمان بتساهم في تقوية العظام مع ممارسة التدريب بشكل مناسب. لكن أهم نقطة هي إننا نختار التمرين والوزن المناسبين لمستوى الشخص، ونتعلم الأداء الحركي الصحيح قبل ما نفكر في زيادة الأوزان. لأن الهدف مش إننا نشيل وزن كبير وخلاص، لكن إننا نتمرن بطريقة صحيحة تحقق أفضل نتيجة وتقلل خطر الإصابة.

السؤال الرابع: هل المكملات الغذائية مضرة؟ المكملات الغذائية مش كلها مضرة، وفي نفس الوقت مش كلها ضرورية. الموضوع بيتحدد حسب نوع المكمل، والجرعة، والحالة الصحية للشخص، ومدى احتياجه الفعلي ليه. مثلًا، مكمل البروتين ممكن يكون وسيلة عملية لتكملة احتياج الشخص اليومي من البروتين لو مش قادر يوفره من الطعام. لكن المكملات مش بديل عن الأكل المتوازن، ومش هي الأساس في بناء العضلات.

السؤال الخامس: هل لازم نستخدم البروتين بعد التمرين؟ مش شرط نستخدم مكمل البروتين بعد التمرين مباشرة، لأن الأهم هو إجمالي كمية البروتين اللي الشخص بيحصل عليها خلال اليوم، مع توزيعها بشكل مناسب على الوجبات. البروتين بيساعد في إصلاح الأنسجة العضلية ودعم نمو العضلات والتعافي بعد التدريب. وممكن نحصل عليه من مصادر طبيعية زي البيض واللبن والجبنة واللحوم والأسماك والبقوليات. أما الواي بروتين، فهو مجرد وسيلة سهلة لتكملة الاحتياج اليومي عند الضرورة، مش شرط أساسي لبناء العضلات. والنتائج الحقيقية بتعتمد على مجموعة عوامل، أهمها التدريب المناسب، والتغذية، والنوم، والاستمرارية.

السؤال السادس: تنصحي الناس تدخل الجيم وتمارس الفتنيس؟ طبعًا، بنصح كل شخص إنه يدخل الرياضة ضمن أسلوب حياته، بما يتناسب مع قدراته وحالته الصحية. لأن الفيتنس مش مجرد شكل خارجي أو عضلات، لكنه استثمار في الصحة والقوة واللياقة والثقة بالنفس. ومش لازم الشخص يبدأ بمستوى عالي أو أوزان كبيرة؛ الأهم إنه يبدأ بخطة مناسبة ليه، ويتعلم الأداء الصحيح، ويلتزم بالتدريج.