السؤال الأول: عرفي نفسك الأول.

أنا ميران محمد، عندي ٢٣ سنة، خريجة سياحة وفنادق قسم طيران. ورغم إن دراستي ملهاش علاقة مباشرة بمجال الرياضة، إلا إني دخلت المجال عن طريق كورسات دولية، واشتغلت على نفسي كتير، وفضلت أتعلم وأطور من نفسي لحد ما قدرت أبدأ في المجال اللي بحبه فعلًا. ومع الوقت أصبح عندي شغف كبير بمجال الـFitness، وبقي هدفي إني أفضل أتعلم وأطور من نفسي وأكتسب خبرات أكتر في المجال.

السؤال الثاني: ابتديتي رياضة إزاي وحبيتي الجيم إزاي؟

أنا بدأت أتمرن من زمان، لكن في البداية مكنتش باخد الموضوع بجدية، كنت بتمرن شوية وأقطع، وأوقات كتير كنت أقعد أهزر في التمرين 😅. لكن في وقت معين بدأت آخد الموضوع بجد، والتزمت أكتر، وبدأت أشوف نتيجة وتغيير في جسمي وشكلي. والنتيجة دي كانت نقطة مهمة جدًا بالنسبالي، لأنها خلتني أشوف قد إيه الالتزام والاستمرارية ممكن يغيروا في شكل الجسم وفي الشخص نفسه.

وكان بابا دايمًا أكبر Support ليا، وكان بيشجعني جدًا ويدعمني في أي خطوة باخدها، وهو من أكتر الناس اللي شجعوني إني أكمل في المجال وأطور من نفسي. ومن هنا بدأت أخد كورسات وأتعلم أكتر، والحمد لله قدرت أخد كورسات دولية، وبدأت أشتغل على نفسي وأطور من معلوماتي ومهاراتي، لأني فعلًا بحب المجال جدًا وحاسة إن ده المكان اللي حابة أكمل فيه.

ومع الوقت، حبي للتمرين اتحول لحب للتدريب نفسه. بقيت أحب فكرة إني أساعد غيري يوصل للنتيجة اللي نفسه فيها، وأكون جزء من رحلته وتطوره. وده خلاني أقرر إني أكمل في المجال وأفضل أتعلم وأطور من نفسي أكتر.

السؤال الثالث: إيه الفرق بين تمارين الكتف والظهر؟

من أكتر الأخطاء الشائعة في التمرين إن بعض الناس تفتكر إن تمرينة الكتف والظهر قريبة من بعض، خصوصًا إن بعض عضلات الكتف بتدخل فعلًا في تمارين الظهر، لكن في الحقيقة كل تمرينة ليها هدف وعضلات أساسية مختلفة.

تمارين الظهر، أو الـBack Workout، الهدف الأساسي منها هو تقوية وتطوير عضلات الظهر، سواء من ناحية العرض أو السمك، وتحسين قوة الجزء العلوي من الجسم وشكل الظهر. ومن أهم العضلات اللي بنستهدفها عضلة الـLats والـTraps والـRhomboids وعضلات منتصف وأعلى الظهر، بالإضافة لبعض عضلات أسفل الظهر حسب نوع التمرين. وتمارين الظهر بتعتمد بشكل كبير على حركات السحب، زي الـLat Pulldown والـSeated Row والـT-Bar Row والـOne Arm Row.

أما تمرينة الكتف، فالهدف الأساسي منها هو تقوية وتطوير عضلات الكتف وإعطاء الكتف شكل متناسق وأقوى. والكتف بيتكون من ٣ أجزاء رئيسية: الكتف الأمامي أو الـFront Delt، والكتف الجانبي أو الـSide Delt، والكتف الخلفي أو الـRear Delt. وعشان نطور الكتف بشكل متوازن، لازم نهتم بالثلاث أجزاء، ومن أشهر التمارين الـShoulder Press والـLateral Raise والـFront Raise والـRear Delt Fly.

فبشكل عام، الفرق الأساسي إن كل تمرينة بيكون ليها هدف وعضلات أساسية بنركز عليها، حتى لو فيه عضلات بتشارك في أكتر من حركة.

السؤال الرابع: تنصحي الناس تدخل جيم ورياضة وFitness؟

طبعًا أنصح الناس بدخول الجيم والاهتمام بالرياضة، لأن الرياضة بالنسبالي مش مجرد شكل أو هدف عايزين نوصل له، لكنها أسلوب حياة. وأنا شخصيًا الرياضة كانت مهمة جدًا في رحلتي، خصوصًا إني مريت بظروف صحية وعملت عملية استئصال للغدة الدرقية، ومع ذلك موقفتش عن الاهتمام بنفسي والتمرين، وطبعًا كنت بتمرن بما يتناسب مع حالتي وتحت المتابعة المناسبة.

التجربة دي علمتني إن وجود ظروف أو تحديات في حياتنا مش معناه إننا نستسلم أو نبطل نهتم بنفسنا. بالعكس، ممكن الرياضة تكون جزء مهم من رحلتنا وتساعدنا نحافظ على صحتنا ونكون أقوى في مواجهة التحديات.

لكن في نفس الوقت، مهم إن كل شخص يعرف إمكانياته وحدوده، ويبدأ بالطريقة المناسبة ليه، خصوصًا لو عنده أي ظروف صحية، وفي الحالة دي لازم يكون فيه متابعة مناسبة من المختصين.

وبالنسبالي أهم حاجة إننا مانبصش للرياضة على إنها فترة مؤقتة عشان نخس أو نغير شكلنا، لكن نحاول نخليها جزء من حياتنا وأسلوب حياتنا على المدى الطويل.

https://www.instagram.com/meran_mohaamed?stkn=MTZ5YWJrMWd1MmI4cg==