شاهد ماذا فعلت كوتش نورهام المنياوي في يوجا : فيديو و الصور
أنا اسمي نورهام المنياوي، مهندسة تخطيط عمراني، رحلتي مع اليوجا بدأت بسبب الشغل في الهندسة بما اننا اوقات ضغط المشاريع بنشتغل ساعات كتير ممكن توصل ل ١٠ ساعات او اكتر،
حصلي مشكلة صحية في ٢٠١٣ بسبب ضغط الشغل لدرجة اني لما بكون واقفة بحس بدوخة جامدة واني هقع على الارض، والتشخيص ان عضلاتي بقت ضعيفة جداو خصوصا عضلات الرقبة ومش متحملة وزن الجمجمة، وتيبس في عضلات الجسم عموما، وكنت فعلا وصلت لمرحلة مش عارفة اتحرك وانا بصلي وانا نايمة على السرير، واخدت ادوية كتير وحالتي متحسنتش، لحد ما بالصدفة اختي لاقت عًلي الفيسبوك مدرب يوجا ومعالج ريفلكسولًجي، كلمته وروحت وقالي ازاي عضلاتي يتفك منها التيبس والحمد لله اتحسنت وبدأت كل اسبوع اروح مرة yoga session وفعلا جسمي بدأ يظبط والحركة بقت احسن.
حصل اني ملتزمتش اوي في الحضور لظروف عمدي والمدرب كمان وبعدها سافر بره مصر، وقعدت فترة من غير رياضة لحد ما عملت حادثة في ٢٠١٥ وحصلي شرخ في عظمة الترقوة في كتفي الشمال واليمين ضعف بسبب التحميل عليه ومبقتش قادرة اشيل شنطة ايدي، ودكتور عظام نصحني اني لازم العب رياضة، نزلت چيمً فعلا والتزمت فيه، بس للاسف من غير تغذية سليمة ومكنتش مع مدرب خاص فاللي حصل ان وزني نزل ومافيش عضلات قويت وكمان مكنتش بحب فرهدة تمارين الچيم، لحد ما في يوم لاقيت كلاس يوجا انبسطت قلت اطلع اجرب حسيت وقتها
I belong here
ومن وقتها ظبطت مواعيدي على مواعيد yoga classes ، لحد ما حصل ان اليوجا اتلغت من الجيم، فبدأت ادور على مكان متخصص ستوديو يوجا كان الكلام ده في ٢٠١٧، وربنا وفقني ولاقيت مكان في الزمالك والتزمت فيه حوالي سنتين، قد ايه كنت مبسوطة بنفسي وعضلاتي ظبطت جدا وتعب وجع العضلات اللي كان بيجيلي في الشتاء و مخصوص الحمد لله بطل يجيلي.
بعد كده حصل وقت الكورونا مكنتش ملتزمة مع نفسي في البيت العب لحد ٢٠٢١ قلت لازم اًرجع ادور على مكان والتزم فيه، ولاقيت فعلا كذا مكان في المعادي وجربتهم بسبب ظروف تغيير الكوتش او ظروف في المكان.
في ٢٠٢٢ بدأت افكر اني افتح لنفسي career path تاني وقعدت افكر كتير لحد ما قررت ابقى Yoga Teacher واللي ساعدتني في كده المدربة حنين منصور صاحبة Soul zone studio ، دلتني على الطريق وحابة اشكرها،
وبقيت في ٢٠٢٣ مدربة يوجا معتمدة دراسات لمده ٢٠٠ ساعة وبدرس انواع Hatha/Vinyasa/Restorative وطبعا بيكون في Meditation Time في الكلاس.
ليه اخترت اني اكون مدربة يوجا لاني استفدت منها على كذا مستوى (الصحي/النفسي/الذهني/الروحي)
الصحي ان عضلاتي بقت افضل واقوى،النفسي بقيت اسمع صوتي الداخلي اكتر واني اركز مع نفسي في اللحظة اللي انافيها، الذهني تفكيري بقى اهدى بقت اخد وقت اكتر في التفكير قبل اي موقف لاني كان سهل ان حد يعصبني بسرعة وممكن اضيع حقي بتسرعي ونومي اتحسن كتير بقيت انام بعمق، الروحي اني بقيت اصلي بعدوء اكتر لاننا في اليوجا بنتعلم نتحرك بيطء وبهدوء واتنفس صح، فده انعكس اني بقيت باذخد وقتي في الصلاة وبقت احس اني مستريحة اكتر.
حاليا بطور نفسي اكتر وباخد كورسات تساعدني في اليوجا واني اطور نفسي والكلاسات وممكن اضيف حاجات جديدة للكلاس.
حلمي ان يكون عندي ستوديو خاص بيا يكون في كلاسات يوجا وممكن انواع كلاسات تانية، وعايزة يكون تركيزي اكتر مع السيدات لانهم الايام دي بثوا مضغوطين اكتر بسبب انهم في سوق العمل ودورهم في بيوتهم، فالتوتر والضغط بيكون زيادة عليهم ومن حقهم يكون ليهم وقت ليهم يفصلوا من ضغوط الحياة وييقوا أهدى ويشحنوا طاقتهم.
واشجع الكل انه يجرب اليوجا فعلا هتفرق معاكم على جميع المستويات، اهمهم التنفس والصحة النفسية.
واقول لاي حد نفسه يكون عنده كارير تاني اقوله دور على شغفك واتمسك بيه لان الحاجة اللي انت بتحبها وعندك شغف فيها هتعملها بحب وتحط فيها مجهودك بحب.
ومستنياكم تجربوا معايا كلاس يوجا 🧘🏻
إرسال التعليق