بسم الله الرحمن الرحيم

انا هتكلم عن رحلتي في الثانوية العامة بدات من الصف الثالث الثانوي . انا كنت مجتهدة جدا

مكنتش فيها سوشيال ميديا مفيش موبايل …اجتهدت فيها علي قد ما اقدر

لحد لما بدأت من نص الثانوية العامة الترم التاني … صديقة عمري وطفولتي خدلتني جدا بدأت تتكلم عني بالسوء …..الخ من الحوارات الكدابه ونكر الجميل والعشرة

بعدها مستر يعني كان بيديني مادة معينة بدون ذكر هي اى أو اسمو اى …. فجاة بدا يتعامل معايا بطريقة مختلفة اثر علي نفيستي … بطلت اخد عنده شهرين … بعدين قلت خلاص هرجع تاني علشان مصلحتي مع العلم أن المستر دا كانت معزتو عندى كبيره دا غير أن الأهل يعرفوا بعض وعلشان ميحصلش زعل من اهلى ناحيتو مرضتش اقولهم انو بيعاملني وحش واني بطلت درس عندو وقولت خلاص يا أمنيه المسامح كريم…..والحمد لله الامتحانات جت وحليت كويس جدا وكنت راضيه اوى من نفسي وخلصت امتحانات

نيجي لنتيجة الثانوية العامة ..دي كانت اكبر كارثة في حياتي … الصدمة اللي ما توقعتهاش ومحدش توقعها كان خلاص كله بيقول امنية دكتورة … احنا مستنيين نشوف اسمي اصلا في اوائل الجمهوريه بس للأسف ربنا ماوفقنيش في النتجية و شلت ماده ….. دي الكارثة الاكبر يعني يوم ماكنت حاطة طموحي وقولت لو مجبتش بشرى هدخل علاج طبيعي وزيي زي اى طالب ثانويه عامه بيكون طموحو على قدر مستواه طول السنه وعمرى متوقعت انى اشيل ماده وفي اهم سنه دراسيه في حياتي💔

والمفاجأة الاسوأ على الإطلاق….انا شلت المادة و نفس المادة اللى

المستر كان بيديهالى و كان اثر علي نفسيتي بالرغم اني حليت فيها كويس جدا بس الحمد لله دا كان قدر ربنا وحاولت أنى أرضي باللى ربنا كتبهولى

ذاكرت و حاولت كتير وجيت علي نفسي وعافرت و كانت فترة صعبة جدا 💔

انا كنت بستعد للدور التاني ودي كانت صدمة في حياتي ولا انا ولا اهلى قادرين نستوعب احنا كنا فين وبقينا فين

دى اول مرة بالرغم إن أنا كنت من المتفوقين طول سنين دراستي كلها…

حاولت و اجتهدت وخلاص هعتبر ان ده اختبار تاني من ربنا ليا و ذاكرت وخلاص انا بكره امتحاني….

كانوا المراقبين بيقولوا احنا هنخلي المدرسين ييجوا يحلوا نموذج الدور الثاني و خلاص عايزين ننجح الطلاب

وبحكم أن والدى كان ليه معارف كتير جدا قدر انو يوصل للمراقبين وبيوصيهم عليا لانو عارف نفسيتي تعبانه وقالهم اهم حاجه بنتي تفضل قدام عنيكوا انا كدا كدا واثق من مستواها وربنا يجبر بخاطرها ….

اقترحوا عليه لو يعرف مدرس يحل النموذج يساعد بيه بنتو و باقي صحابها

والدي راح بالصدفه لنفس المستر دا عشان يحل النموذج – ( طبعا زى مقولت فوق هو معندهوش علم بالاسلوب اللى كان بيعاملني بيه وبحكم اننا عارفين بعض من ناحية الاهل كان هو اول حد جيه في بالو) –

قابل والدي بطريقه سيئه جدا جدا بدون اعتبار انو اب ونفسو مكسورة ومفرحش ببنتو وإنو جايلو في خدمه اساسها

العشم

المستر فضل يقولو اصلا دا مستواها و هي بتدلع طول السنه ومكانتش بتذاكر واصلا تستاهل اللى هي فيه وكلام كتير يقطع القلب
والدى طبعا مشي من عندو عينو مليانه بالحزن وكسرة النفس والقهره
ليه بجد انسان يجرح اب بالشكل دا في وضع محزن زى الوضع دا ليه منراعيش موقف الناس اللى قدامنا ونختار الكلام اللى نقولو حسب الموقف اللى احنا فيه…..

انا رحت امتحاني تاني يوم و حليت حلو اوى قبل نص الوقت انا كنت خلصت وبقا النموذج بتاعي هو النموذج اللى باقي صحابي بيحلو منو لو محتاجين مساعده لدرجه ان في مراقب قالى يا بنتي انتى ازاى دور ثانى وانتى شطره كدا …كلامو خلاني عيط ودموعي مقدرتش امسكها ما انا اصلا عرفه أن دا مش مكاني بس دا نصيب ربنا والحمد لله ❤‍🩹
ده الجزء الصعب جدا اللي انا محتاجة اتكلم عنه
الحمد لله نجحت في الدور الثاني ونسقت و دخلت كلية علوم الرياضه

مش هنكر أنى مكنتش قادره اقتنع بالواقع اللى كنت فيه بس كان لازم اسعى واجتهد وفعلا عملت كدا ، انا من اول تيرم كنت متفوقه وكل الدكاتره عرفوني والحمد لله كنت محبوبه جدا وكنت بقع اوقات وايأس وارجع افتكر هدفي وانى لازم انجح في دراستي و ارجع كرامة والدى وأثبت للمستر انو ظلمني و كسرني و زاد جرحي الضعف
بدأت اشارك في بطولات الجامعة وبطولات بإسم الكليه وبدات اقف فعلا على رجلى وبشوف نظرة الفخر فعيون ماما و بابا وكل الناس اللى بيحبوني وكنت بطلع من اوائل دفعتي كل سنه
وبالرغم أن كل مكان هنقابل فيه الناس الكويسه برضو هنقابل ناس مش احسن حاجه وشوفت مواقف وحشه جدا جدا فالكليه تخلى الجمل يقع ويقول مش هكمل بس انا كملت واستمريت و واجهت كل مشاكلى و أزماتى لوحدى واعيط واستمر كل دا علشان هدف واحد وهو انى اخلى بابا و ماما فخورين ببنتهم ❤️

فالجامعه قابلني دكتور كان كل هدفو فالمحاضره انو يعجز أمنيه ويتنمر على أمنيه لأنى كنت متفوقه جدا ومكانش في سؤال بيفوتني غير وبكون عارفه أجابتو لدرجه كان بيكلفني اشرح معادلات لدفعتي في سبيل بس انو يلاقي اى فرصه ينقصني فيها درجات بحكم انى معرفتش ارفع مستواهم بس انا كنت اقوى منو بكتير انا فعلا كنت في معيّة الله يجماعه كان ربنا بيساعدني في كل مُره و محنه❤‍🩹
وفاتت سنه ورا سنه بحلوها و مرها والحمد لله وصلت سنه رابعه وناقشت مشروع تخرجي وكنت من افضل دفعتي في محتوى رسالة التخرج وكل لجنة المناقشة شكروا فيا كتير جدا كل دا بفضل ربنا ثم مجهودى واتخرجت و طلعت الرابعه على دفعتي واتكرمت من المحافظ و رئيس الجامعة و عميد كليتي وبحضور دكاتره كبار جدا فالجامعه

فالنهايه حابه اقول شكرا يا مستر انك عملت معايا مواقف صعبه خلتني قويه وان يمكن لو مكنتش عملت كدا كان ممكن موصلش للى انا فيه دلوقتي وشكرا انك كنت هدفي الأربع سنين أنى اثبتلك انك ظلمتني وكسرت نفسي و نفس والدى بحجة أن عندك مبادئ بس احب اقولك أن المبدا مبيتجزأش ولما تقرأ كلامي هتعرف انا ليه بقولك كدا
انا رفعت راس والدى و والدتي واخواتى اللى كانوا حاطين كامل ثقتهم فيا انى هنجح وهرفع رأسهم شكرا على دعمكوا و وجودكوا جمبي وعايزه اقولكوا أن دى مجرد البدايه والله لسه مجرد بدايه ♥️
حابه اقول أن في طيف جميل ظهر في حياتي في آخر تيرم في دراستي غير حياتي من الاجمل للأروع و الالطف كانت رحلتنا من مجرد زمايل دفعه لخطيبي وصديق الطريق و رفيق الدرب أن شاء الله شكراً انك لما جيت في وقت قصير جدا دعمتني دعم كبير اوى وكنت سند ليا فعلا في وقت ما انا كنت محتاجه حد يدعمني ويفهمني♥️

عايزه اقول لكل طلاب الثانوية العامة اوعوا تخلوا اى حاجه تأثر عليكوا ومتسمعوش لكلام اى حد اوثقوا في ربنا وفنفسكوا وسيبوها على ربنا وإن لكل مجتهد نصيب ربنا قال اسعي يا عبدى وانا معك♥️

بطولات حققت مع كوتش امنية :                                           – بطولة جامعة العريش للملاحه الرياضيه و حصولى على دبلوما من الاتحاد المصرى للملاحه الرياضيه
-بطولة العروض الرياضيه على مستوى الجمهورية والحصول على المركز الثانى بالقاهره لعام 2021/2022

– بطولة العروض الرياضه على مستوى الجمهورية للجامعات والحصول على المركز الأول لعام 2023/2024
–
-بطولة لعبة كرة الطائره في بطولة اولمبياد الفتاه الجامعيه بمدينة شرم الشيخ

-المشاركه في برنامج تنمية المهارات في إطار مشروعي (مشوارى) التابع لوزارة الشباب و الرياضه و منظمة يونيسيف