الاسم هاجر القشلان

السن ٣٧ سنه

حاصله على بكالوريوس تربية رياضيه بنات جامعة الاسكندرية سنة 2010 قسم تدريب سباحة

حاصله على دبلومة الاصابات الرياضيه والتأهيل سنة 2011 جامعة الاسكندرية Certificate of personal trainer Gold’s Gym Academy, Cairo الحكايه بدات من اول يوم دراسة اتعرض عليا كورس فى Gold’s Gym Academy

كنت تقريبا تانى دفعه على مستوى الجمهورية تاخد الكورس ده بعدها على طول بدات اشتغل فى مجال الجيم . وقتها بس اكتشفت شخص جديد جوايا مكنتش اعرف عنه اى حاجه كنت بستغرب ازاى ناس اكبر منى بتثق فى كلامى وبتسمع كلامى . بدات اشتغل على نفسى اكتر واطور من نفسى دايما بعرف كل حاجه جديده فى المجال

فضلت كده لحد ماتخرجت وكل يوم اكتشف فى نفسى حاجه جديده . بدات استخدم كل حاجه درستها واستفيد منها كويس اوى فى مجال شغلى بدات اعمل Classes جديده بعد فترة بدات اشتغل فى مجال تدريب السباحة واثبت جداره فيه برضه . اى شغل كنت موجوده فيه كان بيبقى هدفى الاول والاخير انى اوصل بالناس انهم يحققو ولو جزء بسيط من حاجه اتمنوها. وفى 2018 اكتشفت ان عندى كانسر فى الغدة الدرقيه وانى لازم اوقف شغل وابدا عمليه واخضع لجلسات علاج كانت اكبر صدمة فى حياتى حسيت كل حاجه بنيتها اتهدت فى لحظة . عملت العمليه بعد تردد كتير وبدات اخد جرعات العلاج ووقتها وزنى وصل ل ٩٠ كيلو . فقدت الثقه فى نفسى مكنتش بحب اتكلم عن مرضى ولا بحب اشوف نفسى فى المرايه. كانت حياتى عباره عن نوم فى السرير واكل وقاعده فى وسط اولادى علشان اشبع منهم . فضلت كده لحد 2022 اخدت قرار انى لازم ارجع تانى واقف على رجلى . بدات شغل سباحة تانى بدات اتمرن واظبط اكلى اه مارجعتش زى زمان بس مابقتش ال ٩٠ كيلو برضه . بعدها اتشجعت ونزلت اشتغل فى الجيم تانى . اشتغلت على نفسى اكتر وبدات ارجع واساعد الناس انها توصل لهدفها ولسه مستمرة وهفضل لحد اخر يوم كده اساعد نفسى واساعد الناس . هدفى الحقيقى انى اقدر اوصل للناس كلها ان مفيش حاجه اسمها مستحيل ربنا بيسبب الاسباب وبيحطنا فى طريق بعض علشان نتعلم ونعرف ان ربنا قادر على كل شئ . وبتمنى انى اكون مصدر سعاده وتفاؤل لكل حد يعرفنى