عرفينا بنفسك؟
ج: اسمي رغده محمد المصري، وبمارس جري المسافات الطويلة، وركوب العجل، والتنس الأرضي.

هل الرياضة بالنسبة لك مجرد هواية؟
ج: لا، الرياضة بالنسبة لي جزء كبير جدًا من حياتي. كل مرة بمارسها بكتشف نفسي من جديد، هي مش مجرد هواية، دي أسلوب حياة.

ماذا تكتشفين مع كل سباق جديد؟
ج: بكتشف صبري وإصراري، وبحاول دايمًا أخلص السباق للنهاية. بشوف إن السباق زي الحياة، فيه بداية ونهاية، لكن الأهم إني أكون مستمتعة بالرحلة.

هل أثرت الرياضة على حياتك الشخصية؟
ج: طبعًا أثرت جدًا. بقيت أشوف نفسي بشكل مختلف كل مرة، وبقيت أكثر مرونة وعندي روح رياضية بتساعدني أتعامل مع أي أزمة في حياتي.

كيف كانت بداية رحلتك مع الرياضة؟
ج: بدأت من حوالي 12 سنة، وقت ما كنت في الثانوية العامة وكنت حاسة بإحباط. لقيت إيفنت على فيسبوك لناس بتجري جنب بيتي في المهندسين، ونزلت أجري معاهم. بعد كده جرينا في الزمالك، وبقى الموضوع عادة وبنزل مع فريق كل مرة.

هل حققتِ إنجازات خلال رحلتك؟
ج: آه، في 2022 حصلت على المركز الثالث في فئتي العمرية في سباق سوما باي.

ماذا تشعرين بعد الانتهاء من الماراثون؟
ج: بكون مبسوطة جدًا إني قدرت أخلص المسافة الكبيرة، وبحس قد إيه عندي عزيمة وإرادة.

ما أهم الدروس التي تعلمتيها من الرياضة؟
ج: أهم حاجة إن مفيش سن للرياضة، شوفت ناس كبيرة في السن ولسه مستمرة. كمان مفيش حاجة اسمها خوف، لأن الخوف علاجه المواجهة. وأجمل إحساس هو إنك تشوف نفسك بتنجح كل مرة.

كيف ترين تأثير الشغف والطموح في حياتك؟
ج: الشغف والطموح بيتولدوا من جديد مع كل خطوة. الرياضة خلت حياتي أحسن وأكتر صحة وسعادة.