تمرين “الفاكيوم” وأنت واقف.. بطنك مشدودة حتى وأنت في قلب الزحمة!
يا أبطال، في البوستات اللي فاتت اتكلمنا عن أهمية تمرين الـ Stomach Vacuum وإنه “المشد الطبيعي” لجسمك. النهاردة هننقل التمرين لمستوى تاني خالص من العملية.. “وضعية الوقوف.

ليه الوضع ده مهم؟ لأننا أغلب يومنا واقفين أو قاعدين، فإحنا محتاجين نعلم عضلاتنا إنها تفضل شايلة نفسها وشادة البطن لجوه طول اليوم مش بس وقت التمرين. أنا كـ كابتن عز، بعتبر النسخة دي هي “سر القوام المفرود “اللي بيخلي شكلك دايمًا رياضي وواثق في نفسك.

ليه تعمله وأنت واقف؟
في أي مكان: مش محتاج سجادة تمرين ولا وضعية معينة، تقدر تعمله في مكتبك أو وأنت واقف في طابور.

تحكم أعلى: بيجبرك تشغل عضلات الـ Core مع عضلات ضهرك عشان تحافظ على استقامتك.

تغيير محيط الخصر: مع الاستمرارية، عضلات الـ TVA بتبقى أقوى وبتلم البطن لجوه بشكل دايم.

زاي تعمل الفاكيوم وأنت واقف “صح”؟
الوقفة: اقف مفرود، رجلك بعرض كتافك، وإيدك في جنبك أو ساندها على حاجة قدامك (مكتب مثلاً).

النفس: خد نفس عميق من مناخيرك، وبعدين خرّج “كل” الهوا من بقك كأنك بتطفي شمعة.. لازم تحس إن رئتك فضيت تماماً.

الشفط: من غير ما تاخد نفس جديد، اشفط بطنك لجوه (سرتك كأنها رايحة تلمس عمودك الفقري).

الثبات: اثبت على الوضع ده من 10 لـ 20 ثانية وأنت “كاتم نفسك”.

الراحة: سيب بطنك براحة، خد نفسين تلاتة، وكررها 4 مرات.

💎 “تبس” (Tips) ذهبية من عز لنتائج صاروخية:
ركز على “الارتفاع”: وأنت شافط بطنك، تخيل إنك بترفع أعضاءك الداخلية لفوق ناحية صدرك.. ده بيزود تفعيل العضلات العميقة.

الاستمرارية أهم من القوة: مش لازم تشفط جامد لدرجة الوجع من أول يوم، المهم إنك تعمله كل يوم الصبح.

معدتك الفاضية هي السر: لو عملته وأنت واكل، مش هتقدر تشفط بطنك صح وممكن تحس بضيق.. أفضل وقت هو أول ما تصحى أو قبل الغدا بساعة.

افرد ضهرك: الفاكيوم مبيتعملش وأنت محني.. ارفع صدرك لفوق وكتافك لورا عشان تدي مساحة لبطنك تتشد صح.

جربوا النسخة دي وأنتوا واقفين النهاردة، وقولولي حسيتوا بفرق في شدة البطن ولا لأ؟