إزاي تخسي صح ومن غير ترهلات؟ خلّيكِ فاهمة قبل ما تتعبي على الفاضي 💪🏻

كتير من الناس فاكرة إن الدايت لوحده كفاية، أو إن الكارديو هو الحل السحري لأي وزن زايد، لكن الحقيقة غير كده تمامًا. نزول الوزن الصح ليه معادلة واضحة، وأي إخلال بيها بيؤدي لنتيجة مش مُرضية.

لو اعتمدتي على الدايت مع الكارديو فقط، آه هتخسي، لكن في احتمال كبير لظهور ترهلات.
أما الدايت لوحده فغالبًا هيؤدي لنزول وزن مع ترهلات واضحة وصريحة.
المعادلة الصح بقى هي:
دايت + كارديو + تمارين مقاومة
وده اللي يخلي وزنك ينزل وجسمك يبقى مشدود ومتقسم 💪🏻.

مهم نفهم إن دهون البطن بتنزل من خلال الكارديو وحرق الدهون عمومًا، مش من تمارين البطن نفسها. تمارين البطن دورها تقوية العضلة مش حرق الدهون اللي فوقها، فمش كل شوية تسألي “هنتمرن بطن إمتى؟” 😡
ونفس الكلام على دهون الجلوتس، هي كمان بتنزل بالكارديو مش بتمرين واحد سحري.

النظام الغذائي الصحي لازم يحتوي على كل العناصر الغذائية، لكن بنسب أقل ومدروسة، وده بيكون من وجهة نظر مختص، مش حسب وصفة أكل طالعالك النهارده 😡.
وحوارق الدهون؟ آه عوامل مساعدة، لكن الأساس دايمًا وأبدًا هو التغذية الصحية.

تمارين المقاومة عنصر أساسي لا غنى عنه، لأنها:

• تمنع الترهلات
• تشد الجسم
• تقوي العضلات
• وتخلي شكلك أحسن مع نزول الوزن

ومتقلقيش، مش هتطلعلك عضلات زي الرجالة، أقسم بالله 🔪.

بالنسبة للكارديو والجري، عددهم بيختلف حسب الهدف والوزن الزائد، لكن غالبًا من 3 إلى 5 أيام في الأسبوع، ولازم يكون في يوم أو يومين راحة عشان الجسم يستعيد طاقته.

وقبل أي تمرين مقاومة، الإحماء ضروري جدًا. من 10 لـ15 دقيقة “تسخين” علشان نحمي العضلات من الإصابات.

ولو هنتكلم بصراحة:
الدايت مسؤول عن 70٪ من نجاح نزول الوزن، والـ30٪ الباقيين تنظيم نوم وتمرين.
فمينفعش تيجي تقولي “مش بخس يا كوتش”

وأخيرًا، تمارين المقاومة سواء بوزن الجسم، أو أوزان خارجية، أو أجهزة الجيم (دمبل، بار…)، كلها هدفها واحد:
جسم مشدود، من غير ترهلات، ومتناسق.